خبرگزاری راسک: منابع آگاه و نزدیک به طالبان مدعی شده اند که در آینده نزدیک، بخشی از چرخبال‌های ارتش پیشین افغانستان که پس از سقوط کابل به اوزبیکستان منتقل شده بودند، به طالبان تحویل داده خواهند شد.
به گفته منابع، شمار این چرخبال‌ها ۴۶ فروند است و مقام‌های اوزبیکستانی در این زمینه با طالبان به توافق رسیده‌اند.
پس از فروپاشی نظام جمهوری در ۱۶ اسد ۱۴۰۰، تعدادی از هواپیماها و چرخبال‌های ارتش پیشین توسط خلبانان به اوزبیکستان و تاجیکستان انتقال یافت. طبق آمار وزارت دفاع امریکا، در آن زمان ۴۶ فروند هواپیما به اوزبیکستان و ۱۸ فروند دیگر به تاجیکستان منتقل شد. این مجموعه شامل چرخبال‌های Mi-17 و UH-60 و همچنین هواپیماهای بال‌ثابت از جمله PC-12، C-208، AC-208 و A-29 بود.
طالبان طی سه سال گذشته بارها از همسایگان شمالی افغانستان خواستار بازگرداندن این تجهیزات شده‌اند، اما مقام‌های اوزبیکستان و تاجیکستان تاکنون موضع رسمی و شفافی در این زمینه اتخاذ نکرده بودند. در همین حال، سال گذشته سفیر امریکا در اوزبیکستان اعلام کرد که بر اساس توافقی تازه، ۴۶ هواپیمای منتقل‌شده به اوزبیکستان در اختیار همان کشور باقی خواهد ماند. همچنین سفارت امریکا در کابل از تاجیکستان بابت خودداری از تحویل دادن این تجهیزات به طالبان قدردانی کرده بود.
اشرف غنی، رئیس‌جمهور پیشین افغانستان نیز هنگام فرار از کابل به همراه چند تن از مقام‌های ارشد دولت، از سه چرخبال ارتش برای انتقال به اوزبیکستان استفاده کرد و سپس به امارات متحده عربی رفت.
به گفته یکی از فرماندهان ارتش پیشین افغانستان، ایالات متحده امریکا پیش از سقوط نظام جمهوری، نیروی هوایی افغانستان را با ۲۲۹ فروند چرخبال و هواپیمای نظامی و ترانسپورتی تجهیز کرده بود. اکنون احتمال بازگشت بخشی از این تجهیزات، پرسش‌های تازه‌ای را درباره آینده نیروی هوایی افغانستان زیر حاکمیت طالبان برانگیخته است.
