دیدار وزیر دفاع پاکستان با سفیر تاجیکستان در پیوند به افغانستان

خبرگزاری راسک: خواجه محمد آصف، وزیر دفاع پاکستان و یوسف شریف‌زاده، سفیر تاجیکستان در اسلام‌آباد درباره «وضعیت نظامی، سیاسی، اقتصادی و اجتماعی افغانستان» گفت‌وگو کردند. خواجه محمد آصف و یوسف شریف‌زاده گفتند وضعیت افغانستان مستقیماً بر امنیت منطقه تاثیرگذار است.
اما خبرگزاری دولتی خاور تاجیکستان روز جمعه ۳۰ سنبله/ شهریور گزارش داده است که در این دیدار طیف گسترده‌ای از موضوعات روابط تاجیکستان و پاکستان به ویژه در بخش امنیتی و نظامی مورد بحث و بررسی قرار گرفت. طبق این گزارش، پاکستان از تلاش‌های تاجیکستان برای تقویت صلح و ثبات در آسیای میانه قدردانی کرده است. تاجیکستان و پاکستان که مرز مشترک با افغانستان دارند در سه سال گذشته بارها از خطرات تروریستی از افغانستان ابراز نگرانی کرده‌اند.
مقام‌های پاکستان بارها گفته‌اند تی‌تی‌پی در افغانستان پناهگاه دارد و از خاک افغانستان حملات خود را در داخل پاکستان سازمان‌دهی می‌کند. ممتاز زهرا بلوچ، سخنگوی وزارت خارجه پاکستان روز چهارشنبه ۷ سنبله/ شهریور در یک نشست خبری در اسلام‌آباد گفت گزارش‌های جهانی نشان می‌دهند که فعالیت‌های تحریک طالبان پاکستان و سایر گروه‌های تروریستی در افغانستان ادامه دارد.
امامعلی رحمان، رئیس‌جمهور تاجیکستان هم هشدار داده بود که افغانستان، به ویژه استان‌های شمال و شماری شرق افغانستان، به محل پرورش تروریسم بین‌المللی تبدیل شده است. تاجیکستان یگانه کشوری بود که وقتی افغانستان به طالبان تسلیم داده شد، مخالفت کرد، ولی سایر کشورهای منطقه، راه معامله و تعامل را با طالبان گرفتند و تا امروز هم با این گروه به نتیجه نرسیده اند.