کمیتۀ مهاجرت افغانستان از تاجیکستان خواست که اخراج پناه‌جویان را متوقف کند

خبرگزاری راسک: مصور بهادری، رئیس کمیته مهاجرت افغانستان (آریانا) در تاجیکستان، از اخراج مهاجران افغانستانی از این کشور ابراز نگرانی کرد و از مقامات این کشور خواست از حقوق پناهندگان محافظت و به تعهدات بین‌المللی پایبند باشند. مصور بهادری در بیانیه اخیر خود به خانواده‌های افغانستانی آسیب‌دیده از این اخراج‌ها تسلیت گفته و بر تعهد این کمیته برای حمایت از مهاجران تاکید کرده است.
به نقل از تایمز آف سنترال آسیا، وی خاطرنشان کرده است که روند اخراج، که بیش از یک هفته ادامه دارد، باعث نگرانی گسترده در میان جمعیت پناهجو شده است. کمیته مهاجرت افغانستان که بیش از ۲۷ سال است در تاجیکستان فعالیت می‌کند، به‌عنوان واسطه بین پناهجویان افغانستان و مقامات محلی این کشور عمل می‌کند.
این کمیته که تحت چارچوب قانونی وزارت عدلیه تاجیکستان فعالیت دارد، به نگرانی‌های مهاجران رسیدگی و گفت‌وگو با نهادهای دولتی را تسهیل می‌کند. بهادری از تاجیکستان خواسته تا به تعهدات بین‌المللی‌اش احترام بگذارد. بسیاری پناهجویان افغانستانی در تاجیکستان از آزار و اذیت طالبان فرار کرده و پناهندگی دریافت کرده‌اند.
بهادری بیانیه‌اش را با حمایت از راه‌حل‌های دیپلماتیک برای محافظت از مهاجران آسیب‌پذیر افغانستان و در عین حال حفظ روابط قوی بین مردم افغانستان و تاجیکستان خاتمه داده است.
وی بر لزوم تلاش‌های مشترک برای حمایت از حقوق بشر و تضمین امنیت پناهندگان تاکید کرده است. گفتنی است که تاجیکستان میزبان ده‌ها هزار شهروند افغانستانی است که از سالیان دراز بدین‌سو در این کشور زندگی می‌کنند.