اتحادیهٔ اروپا ۱۴ میلیون یوروی کمک تازه به افغانستان اختصاص داد

خبرگزاری راسک: اتحادیهٔ اروپا اعلام کرده است که برای حمایت از مردم افغانستان ۱۴ میلیون یوروی دیگر در اختیار نهادهای بین‌المللی قرار می‌دهد. براساس اعلامیهٔ منتشرشده در وب‌سایت این اتحادیه، شش میلیون یورو از این مبلغ به «برنامهٔ توانمندسازی جوامع افغانستان» اختصاص می‌یابد؛ برنامه‌ای که با همکاری برنامهٔ انکشافی سازمان ملل (UNDP)، سازمان خواربار و زراعت (FAO)، سازمان بین‌المللی مهاجرت (IOM) و دفتر مبارزه با مواد مخدر و جرایم سازمان ملل (UNODC) عملی می‌شود. با این کمک تازه، مجموع سهم اتحادیهٔ اروپا در این برنامه به ۲۱ میلیون یورو افزایش یافته است.
همچنین هشت میلیون یوروی دیگر به همکاری با «نهاد زنان سازمان ملل» اختصاص داده شده است. این کمک برای ارائهٔ خدمات حمایتی و حیاتی به زنان و دختران، از جمله محافظت، مشاوره روانی و پشتیبانی اجتماعی مصرف خواهد شد. در نتیجه، تعهد مالی اتحادیهٔ اروپا در این بخش به ۲۳ میلیون یورو رسیده است. این تصمیم در حالی اتخاذ شده است که افغانستان هم‌زمان با خشکسالی و سیلاب‌های مکرر، زمین‌لرزهٔ ویرانگر اخیر و بازگشت گستردهٔ مهاجران از ایران و پاکستان با بحران‌های شدید انسانی روبه‌رو است.