تهدید تاجیکستان توسط طالبان تاجیک‌تبار؛ چرا طالبان پشتون‌ تهدید نمی‌کنند؟

خبرگزاری راسک: برخی فرماندهان طالبان در روزهای اخیر هشدار داده‌اند که به تاجیکستان حمله می‌کنند. این فرماندهان اکثرا تاجیک‌تباران هستند که در صفوف طالبان که عمدتا پشتون‌تبار اند، حضور و فعالیت دارند. مولوی امان‌الدین منصور، فرمانده‌ی قول اردوی ۲۱۷ عمری طالبان، بیش‌تر اشتیاق خود را برای حمله به تاجیکستان نشان داده است. منصور از بدخشان و فارسی‌زبان است.
مدتی پیش یک ویدیو از منصور به راسک رسید که در آن از حمله و اشتیاق به حمله علیه تاجیکستان می‌گفت. او در این ویدیو خطاب به اعضای طالبان می‌گوید: «همین [مجاهدین] تخار، قندز و بدخشان بس است. ان‌شاءالله همین مجاهدین را اگر امر کنی، تمام استان بدخشان تاجیکستان را می‌گیرند. همین قسم شوقی و شله هستند و منتظر دستور اند.»
برخی معتقد هستند که اقدامات تحریک‌آمیز طالبان علیه تاجیکستان و تهدید تمامیت ارضی آن کشور سبب شده که دولت دوشنبه با ابراز نگرانی از افزایش خطر تروریسم در افغانستان و احتمال سرایت آن به خاک تاجیکستان، استحکامات مرزی خود را تقویت کرده و رزمایش‌های نظامی را در مناطق مرزی برگزار کند.
به‌نظر می‌رسد مقامات ارشد طالبان به طالبان تاجیک‌تبار این گروه دستور می‌دهند علیه تاجیکستان سخن بگویند و بعد خود به دولت تاجیکستان برسانند که طالبان تاجیک افغانستان به ضد شما است و هرنوع حمایت از آنان به سودتان نیست.
منصور، فرمانده‌ی بدخشانی طالبان، گفته که تنها مانع حمله به تاجیکستان اتحاد این کشور با مسکو است، اما به‌گفته‌ی او، روسیه پس از جنگ اوکراین تضعیف شده و قادر به حمایت جدی از تاجیکستان نیست.
اگرچه منصور با انتشار ویدیویی در شبکه‌ی ایکس گفت که سخنانش مربوط به گذشته بوده و مخالفان طالبان آن را دست‌کاری کرده‌اند، اما به‌نظر می‌رسد اشتیاق حمله به تاجیکستان در میان طالبان شدید است.
پیش از این یک فرمانده‌ی دیگر تاجیک‌تبار طالبان تهدید به حمله علیه تاجیکستان کرد. او گفت که دولت تاجیکستان قادر به ایستادشدن در برابرشان نیست.
این فرمانده با نشر ویدویی خطاب به تاجیکستان می‌گوید: «به حکومت طاغوتی تاجیکستان، خاصتا رییس‌جمهور، ان‌شاءالله به فضل و کرم پروردگار، روزبه‌روز در پیش‌رفت هستیم و امیدواریم که الله متعال روزی برای ما نصیب کند که در داخل تاجیکستان و پایتخت دوشنبه، با همین سلاح، با عزت و عفت وارد شویم.»
او در این ویدیو از شهروندان تاجیکستان می‌خواهد که به طالبان بپیوندند؛«ان‌شاءالله ما شما (اشاره به حکومت تاجیکستان) را نخواهیم گذاشت که به این ظلمی که تا حالا می‌کنید، ادامه دهید. از شما برادران عزیز دعوت می‌کنم که بیایید به صف برادران مجاهد، این قافله‌ی مجاهدین در حال حرکت است.»
اسدالله، تحلیل‌گر مسایل سیاسی، می‌گوید که مقامات ارشد طالبان که عمدتا پشتون‌تبار هستند اعضای تاجیک‌تبار خود را تشویق می‌کنند تا ضد تاجیکستان تبلیغات کنند، اما خود این مقامات با این کار به تاجیکستان می‌رسانند که اقدام به حمایت از طالبان تاجیک برای شان خطرناک است.
او تاکید کرد که طالبان تاجیک‌تبار مهره‌های در دست مقامات ارشد طالبان هستند و ابزار دست آنان قرار گرفته‌اند. به قول اسدالله، طالبان پشتون‌ طالبان تاجیک‌تبار را ابزار قرار داده و در حال ساختن ارتباط خود با تاجیکستان و کشورهای دیگر هستند.
اسدالله معتقد است‌که تهدید تاجیکستان توسط طالبان نشان می‌دهد که این گروه از فکر افراطی خود نگذشته و موجودیت شان تهدیدی برای منطقه است.
پیش از این پاکستان اعلام کرد که طالبان تهدیدی برای این کشور و ممالک هم‌سایه است.